Norskir dómarar fá tíu sinnum hærra kaup en íslenskir

Fótboltadómarar í Noregi fá nærri því tíu sinnum hærri upphæð fyrir að dæma leik í norsku úrvalsdeildinni en íslenskir kollegar þeirra.  

Í Noregi fær aðaldómarinn 14 þúsund norskar krónur eða 260 þúsund íslenskar en aðstoðardómararnir fá 167 þúsund krónur í sinn hlut fyrir hvern leik. Það er rétt tæplega tíu sinnum meira en íslenskir dómarar fá fyrir leik í Pepsi-deildinni.

Í norska blaðinu Bergens Avisen kemur fram að bestu dómararnir í Noregi dæmi 20-22 leiki á leiktíð sem skilar þeim 5,2 til 5,7 milljónum króna.

Í Pepsi-deildinni  fær dómarinn 28,610 krónur fyrir hvern leik sem hann dæmir en aðstoðardómarinn fær 21 þúsund krónur fyrir dómgæsluna.  

Terje Hauge, sem í mörg ár var einn frægasti dómari Noregs, segir í samtali við blaðið að þegar hann dæmdi fyrsta leik sinn í norsku úrvalsdeildinni 1988 hafi hann fengið 200 norskar krónur fyrir dómgæsluna en sú upphæð svarar til 3700 íslenskra króna.  

Hauge segir í samtali við Bergens Avisen að dómararnir sem dæma flestu leikina í ensku úrvalsdeildinni þéni um 20 milljónir króna á hverri leiktíð fyrir dómgæsluna.