Neyðarástand í Suður-Súdan

Sameinuðu þjóðirnar spá því að þrjár milljónir barna í Suður- Súdan verði á flótta, hungruð eða dáin fyrir lok árs vegna yfirvofandi hungursneyðar í landinu. Unicef hefur lýst yfir hæsta mögulega neyðarstigi vegna ástandsins. 

Blóðug átök hafa staðið yfir í Suður-Súdan í hálft ár. Meira en hálf milljón barna hefur neyðst til að leggja á flótta og eru þau sérstaklega berskjölduð fyrir hungri, sjúkdómum og ofbeldi. Mörg þeirra hafa misst eða orðið viðskila við fjölskyldur sínar. 

Ban Ki-moon, framkvæmdastjóri Sameinuðu þjóðanna spáir því að ef fram heldur sem horfir muni helmingur íbúa Suður-Súdan vera á flótta, búa við hungur eða deyja fyrir lok þessa árs. Dánartíðni vegna sjúkdóma á borð við malaríu og lungnabólgu hækkað verulega að undanförnu og Kólerufaraldur sem  breiðist hratt um landið. Ef ekkert verður að gert hafa Sameinuðu þjóðirnar spáð því að 3 milljónir barna í landinu verði á flótta, hungruð eða dáin fyrir lok árs.

UNICEF á Íslandi hefur í dag neyðarsöfnun fyrir börn í Suður-Súdan og biðlar til almennings. Fólk getur lagt söfnuninni lið með því að senda sms-ið barn í númerið 1900 og gefa þannig 1.900 krónur.