Handtekinn rétt fyrir beina útsendingu

Rui Chenggang, einn vinsælasti sjónvarpsmaður Kínverja, var handtekinn og færður til yfirheyrslu í tengslum við spillingarmál síðastliðinn föstudag. Chenggang var handtekinn stuttu áður en hann átti að koma fram í beinni útsendingu og við áhorfendum blasti því auður stóll og hljóðnemi í viðskiptaþætti kínverska ríkissjónvarpsins.

Chenggang er þekktur fyrir sjónvarpsviðtöl sín við þjóðarleiðtoga og framafólk á borð við Bill Clinton og Michael Dell. Hann var handtekinn ásamt framleiðanda og leikstjóra sjónvarpsstöðvarinnar, en kínverski Kommúnistaflokkurinn reynir um þessar mundir að tækla útbreiddan spillingarvanda innan flokksins.