89 manns féllu í sjálfsmorðsárás í Afganistan

Að minnsta kosti 89 manns féllu í sjálfsmorðsárás á markaði í þorpi í austurhluta Afganistans í dag. Árásin er ein sú mannskæðasta í landinu í nokkra mánuði. Enginn hefur lýst yfir ábyrgð á sprengingunni og hafa Talibanar neitað aðild að árásinni. BBC greinir frá þessu.

Markaðurinn var fullur af fólki sem var að versla fyrir Ramadan-hátíðina þegar bíl, sem var hlaðinn sprengiefnum, var ekið inn í mannfjöldann. 89 manns létust og 42 slösuðust. Flestir hinna látnu voru konur og börn. Að sögn lækna í þorpinu eru spítalar yfirfullir af slösuðu fólki.

Óttast er að deilan um niðurstöðu forsetakosninganna, sem fram fóru í Afganistan í síðasta mánuði, ýti undir óstöðugleika í landinu. Aðeins eru nokkrir dagar síðan forsetaframbjóðendurnir Abdullah Abdullah og Ashraf Ghani, náðu samkomulagi um að hlíta niðurstöðu endurtalningar atkvæða eftir ásakanir um að ekki hafi verið staðið rétt að kosningunum.