Veittu styrk af yfir 100 þúsund ferðum

Styrkurinn sem Krabbameinsfélag Íslands fékk í fyrra frá Hreyfli vegna átaks leigubílastöðvarinnar í október og nóvember nam tæpum 1,4 milljónum króna. Upphæðin í hittifyrra var svipuð.

„Fólki finnst styrkurinn af hverri ferð lítil upphæð en það gerir sér ekki grein fyrir því að ferðirnar, sem greiddur er styrkur af til Krabbameinsfélagsins, nema mörgum tugum þúsunda á mánuði. Það verður talsverður peningur þegar allar ferðirnar eru teknar saman.“ Þetta segir Sæmundur Sigurlaugsson, framkvæmdastjóri Hreyfils, um umræðuna á Facebook um að 12 króna styrkur af hverri pantaðri ferð, sama hversu hátt fargjaldið er, sé lág upphæð.

Sæmundur segir styrkinn eingöngu greiddan ef pantaður bíll leiðir af sér ferð, eins og hann orðar það. „Það er enginn styrkur greiddur þegar pöntuð ferð reynist platferð. Platferðir geta verið yfir þrjú þúsund á mánuði. Þessar platferðir tefja því miður okkar þjónustu þegar margir bíða eftir bíl um helgar.“

Ekki er heldur greiddur styrkur af ferðum þegar viðskiptavinir hóa í leigubíl með bleikt ljósaskilti úti á götu, að því er Sæmundur greinir frá.

Alls aka 350 leigubílar Hreyfils nú með bleiku skiltin sem gerð voru árið 2007 fyrir stöðina þegar samvinnan við Krabbameinsfélagið hófst. „Bílstjórarnir, sem eru sjálfstætt starfandi, eru ekki sjálfir að veita félaginu styrkinn hver og einn, heldur leigubílastöðin sem er í eigu þeirra. Bílstjórarnir taka þátt í átaksverkefninu til að vekja athygli fólks á málefninu. Bleiku ljósin setja svip á umhverfið og hvetja almenning til að gefa þessum málum gaum, ekki bara núna á haustmánuðunum heldur allt árið. Við teljum okkur hafa hitt naglann á höfuðið með þessari aðferð. Samstaða bílstjóra í þessu máli hefur verið góð eins og í öllum öðrum málum,“ segir Sæmundur.