Starfsmenn Háholts efla starfsandann

Samband íslenskra sveitarfélaga undrast að ekki hafi verið haft samráð við það vegna fyrirhugaðs samnings velferðarráðuneytisins við meðferðarheimilið Háholt í Skagafirði.

„Ég hef sent tölvupósta á skrifstofustjóra í velferðarráðuneytinu og forstöðumann Barnaverndarstofu og sagt þeim að það hafi nú verið boðað til fundar af minna tilefni. Ég hef ekki fengið svar,“ segir Guðjón Bragason, sviðsstjóri lögfræði- og velferðarsviðs hjá Sambandi íslenskra sveitarfélaga.

Hann bætir við að sambandið taki ekki beina afstöðu til þess hvort halda eigi áfram rekstri Háholts eða ekki. Það sé þó skýr afstaða sambandsins að innan þessa málaflokks skuli gæta vel að meðferð fjár og setja fjármuni í úrræði sem nýtast.

„Ef þessi úrræði standa tóm vegna þess að Barnaverndarstofa telur ekki ástæðu til að nýta þau vakna spurningar um hvort eigi að halda þessu úrræði áfram.“

Hinrik Már Jónsson, annar tveggja forstöðumanna heimilisins, gefur ekki mikið fyrir gagnrýni á lélega nýtingu á heimilinu. Hann segir óskandi að nýtingin væri 100 prósent að öllu jöfnu en það sé því miður ekki raunin.

Inntur eftir því hvað starfsmenn, sem eru ellefu talsins, geri á vöktum þegar enginn eða fáir unglingar dvelja á heimilinu í lengri tíma, segir Hinrik að slíkt hafi aðeins einu sinni komið fyrir og þá hafi heimilið staðið autt í þrjár vikur annars sé yfirleitt um fáa daga að ræða í senn. „Við nýttum hluta af þessum tíma í endurmenntun, en einnig nýttum við tímann til að styrkja félagslega þáttinn hjá starfsfólkinu. Við fórum til dæmis saman í hestaferð eina helgi sem var mjög gott því það er mikilvægt að hafa samhentan starfshóp.“

Að sögn Hinriks dvelja tveir unglingar á heimilinu um þessar mundir.

Að mati Hinriks er mikilvægt að halda úti meðferðarheimili eins og Háholti þar sem það þjóni ákveðnum hópi unglinga sem engir aðrir staðir henta. Spurður hvort skortur á sérhæfðu fagfólki, eins og geðlæknum, í Skagafirði til að koma að meðferð unglinganna hafi reynst vandmál segir hann svo ekki vera en sækja þurfi aðstoðina til Reykjavíkur:

„Við erum í Skagafirði, ekki á heimsenda. Það er alveg hægt að fá þjónustu geðlæknis og barnasálfræðing þó að maður þurfi að sækja hana til Reykjavíkur. Við höfum einnig í nokkrum tilfellum fengið geðlækni hingað til okkar úr borginni.“