Slegist um markvarðarstöðuna

Freyr Alexandersson, þjálfari íslenska landsliðsins, valdi í gær 20 leikmenn fyrir mikilvæga leiki í undankeppni HM 2015. Leikið verður gegn Ísrael og Möltu ytra í upphafi næsta mánaðar en stelpurnar okkar eru með þrjú stig að loknum tveimur leikjum.

Undankeppnin hófst á svekkjandi tapi gegn Sviss sem hefur farið á kostum í riðlinum til þessa en stelpurnar sýndu hvað býr í þeim með frábærri frammistöðu á æfingamótinu í Algarve í síðasta mánuðu þar sem þær nældu sér í bronsverðlaun.

Freyr sagði á blaðamannafundi KSÍ gær að hann væri afar ánægður með ferðina til Portúgals. Bæði hafi árangurinn verið góður og ferðin nýst vel til að undirbúa liðið fyrir komandi átök.

„Við unnum í fjölmörgum þáttum sem við þurftum að bæta í okkar leik og bættum bæði leikgleðina og liðsheildina. Það var mikilvægt,“ sagði Freyr í gær.

Fá forföll eru í liðinu að þessu sinni en þess má geta að Sif Atladóttir er þó enn að ná sér eftir erfið meiðsli. Freyr fer með níu atvinnumenn út með sér, þar af tvo markverði en þjálfarinn segist ekki hafa útnefnt sérstakan aðalmarkvörð liðsins.

„Þóra [Björg Helgadóttir] og Guðbjörg [Gunnarsdóttir] hafa báðar sína kosti,“ útskýrði Freyr. „Það fer eftir hverju verkefni fyrir sig hver muni verja mark Íslands.“

Hann sagði einnig að Sandra Sigurðardóttir, markvörður Stjörnunnar, hafi sýnt á Algarve-mótinu að hún eigi fullt erindi í landsliðið.

„Hún hélt hreinu gegn Kína og stóð sig frábærlega. Að mínu mati eigum við þrjá frábæra markverði sem allar eiga möguleika á að spila í byrjunarliði Íslands.“

Landsliðshópur íslands

Markverðir - Leikir

Þóra Björg Helgadóttir, FC Rosengård 101

Guðbjörg Gunnarsdóttir, Turbine Potsdam 30

Sandra Sigurðardóttir, Stjörnunni 7

Varnarmenn - Leikir/mörk

Ólína Guðbjörg Viðarsdóttir, Val 66/2

Hallbera Guðný Gísladóttir, Torres 50/1

Glódís Perla Viggósdóttir, Stjörnunni 17

Mist Edvardsdóttir, Val 12/1

Elísa Viðarsdóttir, Kristianstad 12

Anna Björk Kristjánsdóttir, Stjörnunni 4

 

Miðjumenn:

Dóra María Lárusdóttir, Val 100/15

Sara Björk Gunnarsdóttir, FC Rosengård 70/15

Katrín Ómarsdóttir, Liverpool 61/10

Rakel Hönnudóttir, Breiðabliki 59/3

Dagný Brynjarsdóttir, Selfossi 40/4

Þórunn Helga Jónsdóttir, Avaldsnes 13

Ásgerður S. Baldursdóttir, Stjörnunni 3

Framherjar:

Fanndís Friðriksdóttir, Arna-Björnar 47/3

Harpa Þorsteinsdóttir, Stjörnunni 38/3

Hólmfríður Magnúsdóttir, Avaldsnes 87/32

Guðmunda Brynja Óladóttir, Selfossi 2