Tíska og hönnun

Furðulegt háttalag hönnuða

Ragnheiður Tryggvadóttir skrifar
Fanney Sizemore smalaði saman hópi hönnuða til að vinna veggspjöld út frá leikritinu Furðulegt háttalag hunds um nótt. Sýningin verður opnuð á mánudag í forsal Borgarleikhússins klukkan 16.
Fanney Sizemore smalaði saman hópi hönnuða til að vinna veggspjöld út frá leikritinu Furðulegt háttalag hunds um nótt. Sýningin verður opnuð á mánudag í forsal Borgarleikhússins klukkan 16.
Furðulegt háttalag hönnuða er yfirskrift samsýningar fjórtán grafískra hönnuða sem opnuð verður í Borgarleikhúsinu á mánudag.

Bjaddni.
"Hugmyndin spratt út frá sýningu sem plakatbekkurinn minn setti upp í Kraká í Póllandi en þar hönnuðum við plakat fyrir eitt af verkum Bertolts Brecht.

Mig langaði að gera eitthvað svipað fyrir HönnunarMars, og spurði Magnús Geir, þáverandi leikhússtjóra, hvort ég mætti halda samsýninguna í forsalnum. Hann tók rosalega vel í þetta, og stakk upp á því að við tækjum fyrir leikritið „Furðulegt háttalag hunds um nótt“.

Það er frábær saga sem býður upp á ríkulegt og fjölbreytt myndmál,“ útskýrir Fanney Sizemore, sýningarstjóri Furðulegs háttalags hönnuða.

Jónas og Erla.
Fjórtán grafískir hönnuðir taka þátt en sýningin er samstarfsverkefni Félags íslenskra teiknara (FÍT) og Borgarleikhússins.

Fanney valdi saman ólíkan hóp hönnuða sem allir fengu bókina að lesa, handritið að leikritinu, miða á leiksýninguna og fund með Hilmari Jónssyni leikstjóra og Finni Arnari Arnarsyni, leikmyndahönnuði sýningarinnar.

Hönnuðirnir fengu síðan frjálsar hendur við útfærslu plakatanna. 

„Það gilda að mörgu leyti sömu lögmál þegar kemur að hönnun plakata og annarri grafískri hönnun en þó er enn þá mikilvægara að eitthvað dragi mann að. Plakötin eru fyrst og fremst auglýsing sem þarf að standa sterk,“ segir Fanney. 

Helga Valdís.
„Mér finnst hugmyndin að baki skipta mjög miklu máli, að reyna að fanga kjarna leikritsins og að aðalskilaboðin skili sér strax. Áhorfandinn þarf einnig að geta staldrað við og fundið dýpri merkingu í myndmálinu sem er kannski ekki augljós við fyrstu sýn.“

Fanney Sizemore.
Hönnuðurnir sem taka þátt í sýningunni eru:

Alli Metall, Bobby Breiðholt, Bjadddni, Fanney Sizemore, Friðrik Svanur Sigurðarson, Helga Valdís Árnadóttir, Helgi Páll Einarsson, Inga María, Jónas Valtýsson og Erla María, Ragnar Freyr, Sig Vicious, Sunna Ben,Sönke Holz og Tobba Ólafsdóttir.

Sýningin verður opnuð í forsal Borgarleikhússins á mánudag klukkan 16.






Fleiri fréttir

Sjá meira


×