Hver prjónuð peysa sendi skýr skila­boð til þol­enda of­beldis

„Með hverri prjónaðri peysu eru send skýr skilaboð um stuðning til þolenda ofbeldis í nánu sambandi. Mikilvægt er að samfélagið allt leggi sitt af mörkum í baráttunni gegn kynbundnu ofbeldi og er þessi herferð kjörið tækifæri til að sýna stuðning í verki. Um leið er þetta tækifæri til að styðja við starfsemi Kvennaathvarfsins sem tekur á móti konum sem búið hafa við ömurleg mynstur ofbeldis,“ segir Linda Dröfn Gunnarsdóttir, framkvæmdastýra Kvennaathvarfsins, í tilkynningu um herferðina.

Þar kemur einnig fram að ofbeldi í nánum samböndum sé sjaldnast einangrað tilvik heldur endurtekið mynstur. Mynstur ofbeldis geti þróast og stigmagnast í erfiðan vítahring sem yfirtekur líf þolandans. Ofbeldismynstrið sé oft mjög falið en eitt skýrasta einkenni ofbeldisins sé í flestum tilvikum einangrun og stjórnun.

Til þess að rjúfa mynstrið þurfi að þekkja það og til þess að rjúfa einangrunina þurfi að sýna þolendum ofbeldis samstöðu. Rannsóknir sýni sömuleiðis að það geti tekið þolendur ofbeldis í nánum samböndum að meðaltali sex til sjö tilraunir að yfirgefa ofbeldissamband til fulls.

239 konur og börn

Í fyrra dvöldu 239 konur og börn í athvarfinu. Þar af 136 konur sem 47 prósent þeirra kvenna sem dvöldu í athvarfinu voru með börn. Konur og börn dvöldu í athvarfinu allt frá hluta úr degi og upp í 186da dagaamkvæmt ársskýrslu samtakanna. Þar kemur einnig fram að í Kvennaathvarfinu í Reykjavík voru að meðaltali 18 íbúar á dag í dvöl. Í athvarfinu á Akureyri voru almennt 1-2 konur hverju sinni, en þó kom fyrir að athvarfið stæði tómt. Veitt voru tæplega 1600 ráðgjafaviðtöl.

„Nafnið á peysunni er Skjól og hefur nafnið tvöfalda tilvísun. Það er sýnileg hvatning til kvenna að stíga út úr einangrun ofbeldis og í það skjól sem Kvennaathvarfið getur veitt þeim. Einnig er það vísun í skjólið sem peysan veitir, með sinni mýkt og hlýju,“ segir Tinna Laufdal, hönnuður prjónauppskriftarinnar og stofnandi Tiny Viking.

Þríþætt markmið herferðar

Í tilkynningu segir jafnframt að markmið herferðarinnar séu þríþætt: að sýna samstöðu og stuðning við konur sem búa við ofbeldi með því að prjóna peysuna, að styrkja mikilvæga starfsemi Kvennaathvarfsins þar sem tekið er á móti konum og börnum þeirra sem eru þolendur ofbeldismynsturs og að vekja samfélagið til vitundar um kerfisbundið ofbeldismynstur í nánum samböndum því til þess að rjúfa mynstrið þarf fyrst að þekkja það.

Fram kemur í tilkynningu að þótt þátttakendur fari allir eftir sömu uppskrift verði prjónaverkið alltaf einstakt, þar sem val á garni, litum og áferð setji persónulegan svip á flíkina.

Hér má finna uppskriftina að peysunni.