Godin: England er lið sem þarf að óttast

Diego Godin, miðvörður Spánarmeistara Atlético Madrid og úrúgvæska landsliðsins í fótbolta, segir að England sé lið sem þarf að óttast á HM í sumar.

Úrúgvæ er í mjög erfiðum riðli með Englandi, Ítalíu og Kosta Ríka þannig baráttan um að komast í útsláttarkeppnina verður hörð.

„Englendingar segja lítið núna en þeir eru með sterkt lið og leikmenn innanborðs sem eru að spila vel. Enska liðið er mjög gott núna þannig það verður erfitt viðureignar,“ segir Godin sem skoraði í úrslitaleik Meistaradeildarinnar á dögunum.

„Ítalir eru líklegastir til að komast áfram en við erum búnir að mæta þeim í tveimur síðustu Álfukeppnum. Fyrsti leikurinn er samt á móti Kosta Ríka sem verður líka erfiður leikur. Það er eiginlega mikilvægasti leikurinn upp á framhaldið,“ segir Godin.

Svo gæti farið að besti leikmaður liðsins og ensku úrvalsdeildarinnar í vetur, LuisSuárez, missir af einhverjum leikja Úrúgvæ á HM vegna meiðsla.

„Þetta var eins og að fá vatnsgusu í andlitið. Það bjóst enginn við þessu. En ég er búinn að hafa samband við hann og hann virkar jákvæður,“ segir Diego Godin.