Átta ára drengur lést eftir að hafa bjargað fjölskyldu sinni úr eldsvoða

Tyler Doohan, átta ára drengur í New York, er álitinn þjóðarhetja í Bandaríkjunum eftir að hann bjargaði sex ættingjum sínum úr eldsvoða.

Hann lét lífið er hann reyndi að bjarga fötluðum frænda sínum út úr brennandi hjólhýsi.

Tyler Doohan fannst látinn í svefnherbergi i hjólhýsi í Penfield í New York fylki.

Níu einstaklingar voru inni í hjólhýsinu þegar eldur braust út aðfaranótt sunnudags.

Doohan náði að vekja sex aðila sem voru inni í hjólhýsinu en meðal þeirra voru amma hans, frænka og tvö börn á aldrinum fjögurra til sex ára.

Hann fór síðan aftur inn í hjólhýsið og ætlaði að vekja frænda sinn, Steve Smith, en allt kom fyrir ekki og drengurinn lét lífið. Afi hans lést einnig í eldsvoðanum.

Drengurinn hafði farið í heimsókn til ömmu sinnar og afa og fengið að gista þar sem frí var í skólanum daginn eftir.