90 mafíósar handteknir á Ítalíu

Lögregla á Ítalíu handtók 90 manns í dag í nágrenni Napólí, í Flórens og í höfuðborginni Róm.

Hinir handteknu eru sagðir meðlimir valdamikillar mafíuklíku, Contini-klíkunnar, og var hald lagt á eignir metnar á yfir 35 milljarða (222 milljónir evra) í eigu meðlima klíkunnar. Contini-klíkan er hluti af stærri glæpasamtökum sem kalla sig Camorra.

Lögreglumenn í Róm biðu mannanna í morgun við krár og pizzastaði sem talið er að klíkan hafi rekið. Einn staðanna er vinsæll veitingastaður skammt frá þinghúsi borgarinnar.

Einn hinna handteknu, 43 ára gamall kaupsýslumaður, slapp þó úr haldi lögreglu á heimili sínu og stökk út um glugga á fjórðu hæð og lést.