Hótar að vísa CNN úr landi

Nicolas Maduro, forseti Venesúela, hefur hótað að láta vísa fréttamönnum CNN úr landinu fyrir fréttaflutning þeirra af átökunum sem nú geisa í landinu.

Hann fer fram á að þeir lagfæri vinnubrögð sín en fréttamenn stöðvarinnar hafa átt erfitt um vik undanfarið. Til að mynda var myndavélum og sendibúnaði þeirra rænt af vopnuðum mönnum á vélhjólum. Telja fréttamennirnir að um óeinkennisklædda lögreglumenn hafi verið að ræða.

Þá hefur forsetinn gagnrýnt fréttaflutning annarra miðla af átökunum og kallað þær stríðsáróður.

Að minnsta kosti sex hafa fallið í átökunum og tugir eru slasaðir. Þá hefur Barack Obama, forseti Bandaríkjanna, hvatt yfirvöld í Venesúela til að sleppa mótmælendum úr haldi sem hafa verið fangelsaðir undanfarna daga.