Íslendingur í Venesúela segir ástandið skelfilegt

Miklar óeirðir hafa geisað í Vensúela upp á síðkastið. Þessi mótmæli eru þau allra mestu frá því að forseti landsins, Nicolas Maduro, tók við embættinu á síðasta ári. Hann tók við embættinu eftir fráfall Hugo Chavez í mars fyrir tæpu ári. Einungis einu og hálfu prósentustigi munaði á fylgi hans og mótframbjóðandanum, Enrique Capriles Radonski. Síðan þá hefur þrálátur orðrómur verið að um kosningasvindl hafi verið að ræða. Þá er Maduro sakaður um harðræði og sagður ábyrgur fyrir bágu efnahagsástandi landsins og hárri glæpatíðni.

Jóna María Björgvinsdóttir býr í Valencia í Venesúela, ásamt eiginmanni sínum og dóttur.

„Þetta er búið að vera margra ára ferli en núna, 12. febrúar síðastliðinn, hófust mótmælin af alvöru. Mótmælin af okkar hálfu, stjórnarandstæðinganna, hafa að öllu leyti verið friðsæl. Við klæðum okkur í hvítt og málum hendur okkar hvítar og göngum fylktu liði um alla borg,“ segir Jóna.

Leopoldo Lopez, leiðtogi stjórnarandstöðunnar, stóð fyrir mótmælagöngu fyrr í þessari viku og tók Jóna María, ásamt eiginmanni sínum, þátt í göngunni. Hún segir gönguna að öllu leyti hafa farið friðsamlega fram af hálfu mótmælenda en á móti þeim hafi tekið her og lögregla sem stóðu í vegi fyrir að þau kæmust á leiðarenda.

„Á móti okkur stóðu vopnaðir menn og var mikið skotið af þeirra hálfu. Ofbeldið er alfarið af hálfu hersins, ríkisins og ríkislögreglunnar. Þeir ganga hérna berserksgangi, skjóta á blokkir og bíla, skjóta táragasi og gassprengjum um allan bæ.“

Nauðsynjavara nánast ófáanleg

Jóna segir há gjaldeyrishöft gera það að verkum að framleiðsla á vörum sé nánast engin og vöruskortur því mikill.  

„Matvörur og aðrar nauðsynjavörur eru ekki að koma inn í landið en þegar vörur loksins koma í verslanir myndast langar biðraðir. Fólk í hundruða tali safnast saman fyrir utan verslunina í þeirri von að fá nauðsynlegar vörur. Hver og einn má ekki kaupa nema ákveðið magn hverju sinni.“

Þá segir hún einnig mikinn skort vera á lyfjum og segir læknisþjónustuna nánast enga.

„Fólk með alvarlega sjúkdóma er í hættu á að fá ekki nauðsynleg lyf því þau eru einfaldlega ekki til í landinu. Ef fólk þarf að fara í aðgerð þá þarf það sjálft að útvega grisjur.“



Mönnum afhent vopn af yfirvöldum

Á miðvikudaginn var, var ung stúlka, 22 ára, skotin til bana. Að minnsta kosti sex hafa látist í átökunum og tugir eru slasaðir.

„Stelpan var skotin af manni á mótorhjóli. Þessir menn eru út um allt, spóla í kringum mann, haldandi á byssum. Orðrómur er að þessum mönnum sé borgað og að þeir fái vopn frá yfirvöldum.“

Allir fjölmiðlar í Venesúela eru ríkisreknir og segir Jóna það ástæðuna fyrir því að fréttir um ástandið birtist ekki í réttri mynd. Hægt sé að fara á internetið og finna myndbönd sem gefi rétta mynd af ástandinu.

 

Samstaða á meðal fólksins

Jóna segir hræðsluna mikla en á sama tíma gefi þetta von um betra ástand og segir samstöðu meðal fólksins mikla.

„Með hverjum deginum sem líður þá er von í okkur öllum um að eitthvað geti breyst. Við eigum skilið að geta keyrt um götur borgarinnar án þess að eiga von á að verða skotin til bana eða rænd. Samfélagið og þjóðin stendur saman.“

Boðað hefur verið til samstöðufunds sem haldinn verður á heimsvísu. Hér á Íslandi verður fundurinn haldinn á Austurvelli klukkan 12 á morgun, laugardaginn 22. febrúar.