Úkraínumenn hefja aðgerðir gegn aðskilnaðarsinnum

Úkraínsk yfirvöld hafa látið til skarar skríða gegn aðskilnaðarsinnum í austurhluta landsins sem síðustu daga hafa haft stjórnarbyggingar á svæðinu á sínu valdi. Olexander Túrtsjínoff, settur forseti landsins, tilkynnti um þetta í morgun.

Hann segir þó að farið verði hægt í sakirnar og enn hafa engar fregnir borist af átökum. Forsetinn sagði á úkraínska þinginu í morgun að með aðgerðunum sé verið að vernda íbúa Úkraínu. Sergei Lavrov utanríkisráðherra Rússa varar Úkraínumenn hinsvegar við og segir að tilraunir til þess að ráðast gegn aðskilnaðarsinnunum geti orsakað það að ekkert verði af fyrirhuguðum viðræðum um málið sem halda á í Genf á fimmtudag.

Á þann fund eiga að mæta fulltrúar Úkraínu, Rússlands, Bandaríkjanna og Evrópusambandsins.