Dýrt að stytta biðlista Landspítalans eftir verkfallið

Tilkynnt var í vikunni að í tillögum ríkisstjórnarinnar fyrir aðra umræðu fjárlaganna sé gert ráð fyrir að Landspítalinn fái einn milljarð króna til viðbótar í rekstur spítalans. Páll Matthíasson, forstjóri Landspítalans, segir þetta ánægjulegt en spítalinn þurfi þó meira fé.

„Það eru ekki öll kurl komin til grafar varðandi það hvar kostnaður á ákveðnum liðum fellur, hjá okkur eða Sjúkratryggingum, sem mun hafa áhrif á þetta,“ segir Páll. Ljóst sé að gæta þurfi aðhalds. „Við verðum að fá fé í ákveðna viðhaldsþætti, meðal annars það að kaupa nýja vararafstöð fyrir Fossvog sem kostar á annað hundrað milljónir.

Það hrundi tölvukerfi hjá okkur í tvo tíma í síðustu viku. Það tengdist vandræðum vegna diskastæðna þannig að við þurfum að fá fé í það. Það er alveg ljóst að við þurfum að setja fé í ákveðin mikilvæg viðhaldsverkefni og taka til dæmis fé úr rekstri. Á sama tíma er náttúrulega mjög ánægjulegt að fá þetta fé,“ segir Páll.

Páll segir læknadeiluna hafa raskað starfsemi spítalans mikið. Kostnaðarsamt geti orðið að vinna upp þá þá löngu biðlista eftir aðgerðum sem myndast hafa á meðan á verkfallinu hefur staðið. Aflýsa hefur þurft 421 skurðaðgerð vegna verkfallsins auk þess sem fresta hefur þurft hjartaþræðingum, kransæðamyndatökum og magaspeglunum.

Páll segir að um fjörutíu aðgerðum hafi verið frestað þá daga sem starfsemi á skurðdeildum hafi að mestu legið niðri.

„Það er alveg ljóst að við þurfum að ráðast í það að forgangsraða fólki þannig að fólk sé ekki í hættu vegna þess að það bíði of lengi eftir að aðgerðum og því að hitta lækni,“ segir Páll.

Páll segir erfitt að leggja mat á það hversu langan tíma það geti tekið að vinna niður biðlistana eftir að verkfalli lýkur.

„Það fer náttúrulega líka eftir því að hve miklu leyti við fáum svigrúm og fjármagn þá til þess að ganga í að taka niður biðlista eftir að verkfallinu lýkur,“ segir Páll.