Barcelona ítrekar að Sanchez sé ekki til sölu

Forseti Barcelona hefur staðfest að Alexis Sanchez, leikmaður liðsins sé ekki til sölu. Mikið hefur verið rætt um framtíð Sanchez sem verður í eldlínunni með landsliði Chile á HM í sumar.

Allt frá því að Barcelona keypti Sanchez frá Udinese sumarið 2011 hafa verið orðrómar að hann myndi snúa aftur í ítölsku deildina. Juventus hefur gjarnan verið nefnt í því samhengi en ensku úrvalsdeildarliðin Arsenal og Liverpool hafa einnig verið nefnd til sögunnar undanfarið.

Nýjustu orðrómarnir eru að Luis Enrique sem ráðinn var sem knattspyrnustjóri Barcelona á dögunum hafi ekki not fyrir Sanchez. Josep Maria Bartomeu, forseti Barcelona, tók fyrir allt slíkt.

"Alexis er einfaldlega ekki til sölu, hann er samningsbundin liðinu og verður það áfram. Hann er hluti af áformum okkar fyrir næsta tímabil, hann átti frábært tímabil og eru allir hjá klúbbnum ánægðir með framlag hans."

"Ég hef ekkert heyrt frá Juventus, þeir hafa ekki haft samband við okkur. Á sumrin verður allt brjálað og það eru of margar sögur til þess að vera sífellt að svara þeim öllum," sagði Bartomeu en talið er að töluverðar breytingar verði gerðar á leikmannahóp Barcelona í sumar.