Ólafur Ingi og félagar í fínum málum eftir fyrri leikinn

Ólafur Ingi Skúlason og félagar í Zulte Waregem stigu stórt skref í átt að því að tryggja sér sæti í bikarúrslitaleiknum í Belgíu með því að vinna 1-0 útisigur á Gent í fyrri leik liðanna í undanúrslitum belgíska bikarsins í kvöld.

Ólafur Ingi spilaði allan leikinn á miðju Zulte Waregem. Hinn 23 ára gamli Þjóðverji Marvin Pourié skoraði eina mark leiksins á 62. mínútu en hann er nýkominn til belgíska félagsins frá FC Kaupmannahöfn.

Zulte Waregem er á heimavelli í seinni leiknum sem fer fram 5. febrúar næstkomandi og nægir þá jafntefli til að komast í úrslitaleikinn sem fer fram í Brussel 22. mars.