Vændiskona ákærð fyrir að drepa yfirmann hjá Google með heróíni

Kona, sem lögreglan segir vera fylgdardömu, hefur verið handtekin vegna gruns um að hún hafi sprautað miklu magni af heróíni í yfirmann hjá tæknifyrirtækinu Google með þeim afleiðingum að hann lést skömmu síðar.

Maðurinn, Forrest Timothy Hayes, á að hafa átt í löngu viðskiptasambandi við hina 26 ára gömlu Alix Catherine Tichleman áður en að hann fannst látinn um borð í snekkju sinni í Santa Cruz þann 23. nóvember síðastliðinn.  Hayes kom víða við í starfi sínu fyrir tæknirisann en hann var meðal annars einn af aðalsprautunum á bak við stafrænu Google-gleraugun.

Rannsóknarlögreglumenn segja að öryggismyndavélar um borð í bátnum sýni svo ekki verði um villst að Tichleman hafi sprautað Hayes með heróini, skömmu áður en hún labbaði út í nóttina eins og ekkert hefði í skorist.

„Í stað þess að reyna að koma manninum til bjargar eða hringja á neyðarlínuna ákvað ungfrú Tichleman heldur að taka saman föggur sínar, þar með talið heróínið og nálar,“ segir í yfirlýsingu frá lögreglunni.

Á hún að hafa stigið margoft yfir lík mannsins meðan á tiltektinni stóð, til að mynda til að klára rauðvínsglasið sitt. Lögreglan segir að hún hafi því næst dregið gardínurnar fyrir svo að enginn sæi inn í bátinn og lík mannsins á gólfinu.

Tichleman mætti fyrir rétt í Santa Cruz í gær en hún hefur verið ákærð fyrir morð, að veita annarri manneskju heróín, fyrir að valda manninum líkamstjóni, eignarhald á fíkniefnum og vændissölu.

Konan hefur montað sig af því á heimasíðu sinni af hafa átt í viðskiptum við meira en 200 manns og að hún rukki oft mörg þúsund dali fyrir kynnin.