Höfuðborg Líbíu á valdi íslamista

Trípolí, höfuðborg Líbíu, er nú á valdi íslamista eftir að þeir náðu tökum á flugvelli borgarinnar. Forseti líbíska þingsins hefur kallað þingið saman til neyðarfundar til að „bjarga landinu“.

Dögun, bandalag íslamista og uppreisnarmanna frá svæðinu í kringum borgina Misrata, hafa átt í átökum við hersveitir stjórnarhersins síðustu vikur og virðast hafa haft betur.

Borgarastyrjöld vofir nú yfir í landinu eftir að liðsmenn Dögunar náðu flugvellinum í Trípolí á sitt vald um helgina og komu á eigin ríkisstjórn. Að sögn breska blaðsins Guardian þýðir það að hópurinn hafi í raun náð tökum á höfuðborginni Trípolí.

Í gær birtust myndir af flugvallarbyggingum í ljósum logum, sem bendir til að íslamistar hyggist eyðileggja flugvöllinn frekar en halda honum.

Átök hafa staðið yfir í landinu allt frá kosningunum í júlí þar sem flokkar íslamista biðu lægri hlut. Hafa íslamistar sakað hið nýkjörna þing um að vera samansett af stuðningsmönnum fyrrum einræðisherrans Muammar Gaddafi sem lést í borgarastyrjöldinni árið 2011.

Hið formlega þing Líbíu, sem er með aðsetur í borginni Tobruk í austurhluta landsins, hefur skilgreint Dögun sem hryðjuverkasamtök og lýst yfir stríði gegn þeim. Í grein Guardian segir að framvinda síðustu daga hafi leitt til að tvö þing starfi nú í Líbíu, annað í Tobruk og hitt í Trípolí.