Topplið riðlanna unnu alla átta leiki sextán liða úrslitanna

Belgía og Argentína voru tvö síðustu liðin sem tryggðu sér sæti í átta liða úrslitum HM í fótbolta í Brasilíu en bæði liðin unnu í dag í framlengdum leik í sextán liða úrslitunum.

Þetta þýðir að öll átta liðin sem unnu sína riðla í riðlakeppni keppninnar unnu sína leiki í sextán liða úrslitunum. Það hefur ekki gerst áður á HM.

Brasilía, Kólumbía, Holland, Kosta Ríka, Frakkland og Þýskaland unnu öll sína riðla og fylgdu því eftir með því að vinna leiki sína í sextán liða úrslitunum.

Það var samt mikil spenna í öllum leikjum sem sést á því að fimm þeirra fóru í framlengingu, tveir enduðu í vítakeppni og tveir unnust á mörkum á lokamínútunum. Það var aðeins sigur Kólumbíu á Úrúgvæ sem skar sig úr.

Fyrir fjórum árum komust 7 af 8 sigurvegurum riðlanna áfram í átta liða úrslitin en það gekk ekki eins vel hjá liðunum sem unnu sína riðla á HM 2006 (6 af 8 áfram), á HM 2002 (4 af 8 áfram) og HM 1998 (6 af 8 áfram).