ESB skerðir kvóta til tíu ríkja vegna ofveiði

Framkvæmdastjórn ESB hefur skert fiskveiðikvóta til tíu aðildarríkja til að vega upp á móti ofveiði síðasta árs.

Kvótaskerðingin nær til þeirra tegunda sem voru ofveiddar á síðasta ári, svo sem ýsu, makríl og síld. Í tilkynningu frá framkvæmdastjórninni segir að kvótinn verði sérstaklega skertur í þeim tilvikum þar sem ríki hafa farið fram úr aflaheimildum tvö ár í röð.

„Ef okkur er alvara með baráttu okkar gegn ofveiði verðum við að fara eftir þeim reglum sem við höfum sett okkur, þar með talið að virða þann kvóta sem hefur verið ákvarðaður,“ sagði Maria Damanaki, framkvæmdastjóri sjávarútvegsmála hjá ESB.

Skerðingarnar ná til mestu fiskveiðiríkja ESB, það er Danmerkur, Spánar, Bretlands og Frakklands, auk Belgíu, Grikklands, Írlands, Hollands, Póllands og Portúgals.

Í þeim tilvikum þar sem aðildarríki hafa þegar veitt allan kvóta sinn á þessu fiskveiðiári og ekki er mögulegt að fara fram á skerðingar, munu skerðingar ná til annarra tegunda á sama hafsvæði.

ESB náði á síðasta ári víðtæku samkomulagi um að binda endi á áratuga ofveiði og að byggja upp fiskistofna fyrir árið 2020.