Giroud í stuði í sigri Frakka á Noregi

Frakkar rúlluðu yfir Norðmenn, 4-0, í vináttulandsleik á Stade de France í París í kvöld en Frakkar eru að undirbúa sig fyrir átökin á HM í Brasilíu sem hefst í næsta mánuði.

Ungstirnið Paul Pogba kom Frökkum yfir strax á 15. mínútu leiksins en fleiri mörk voru ekki skoruð í fyrri hálfleik.

Oliver Giroud bætti við forystu Frakka með gullfallegu marki en hann tók boltann á lofti í kyrrstöðu og þrumaði honum í hornið fjær, 2-0.

Loic Remy, sem spilaði með Newcastle í ensku úrvalsdeildinni í vetur, bætti við þriðja markinu á 67. mínútu og tveimur mínútum síðar skoraði Giroud annað mark sitt.

Það verður ekki amalegt fyrir Frakka að fara með Giroud í stuði á HM en liðið er í riðli með Sviss, Ekvador og Hondúras.

Hinn ungi og bráðefnilegi Mats Möller Dæhli var í byrjunarliði Noregs og þótti standa sig hvað best af leikmönnum gestanna.

Annað lið sem er að undirbúa sig fyrir HM, Japan, vann Kýpur, 1-0, fyrr í dag með marki Atsuto Uchida en AronJóhannsson og félagar í bandaríska landsliðinu taka á móti Aserbaídjan í vináttuleik í nótt.