Bjó til 3,5 kílómetra þýskan fána

Bangladesskur bóndi og mikill stuðningsmaður þýska landsliðsins sýndi 3,5 kílómetra langan þýskan fána sinn fyrir úrslitaleik HM sem fram fór í gærkvöldi.

Fáninn var til sýnis á leikvangi í bænum Magura í vesturhluta Bangladess á laugardaginn og mætti ræðismaður Þýskalands til sýningarinnar. Talsmaður þýska sendiráðsins í Bangladess segir að heimamenn hafi gengið fjóra hringi um völlinn með fánann og að fleiri hundruð hafi mætt til að verða vitni af viðburðinum.

Ræðismaðurinn afhenti Amjad Hossai, hinum 65 ára gamla bónda, treyju og viðurkenningu fyrir einlægan áhuga sinn á landsliðinu.

AFP greinir frá því að áhugi bóndans á þýska landsliðinu hafi kviknað eftir að hann tók lyf framleitt í Þýskalandi þegar hann var að jafna sig eftir gallsteinaaðgerð. „Ég byrjaði á fánanum eftir HM í Þýskalandi árið 2006. Ég bætti við fánann í kringum HM 2010 og svo aftur núna. Hann er orðinn 3,5 kílómetra langur.“