Þriggja ára stúlka vaknaði í eigin jarðarför

Þriggja ára stelpa, sem talin var dáin, vaknaði í eigin jarðarför á Filippseyjum um helgina.

Stelpan var úrskurðuð látin á laugardag eftir að hafa verið lögð inn á spítala í Aurora í Zamboanga del Sur vegna þrálátrar hitasóttar.

Rannsóknarlögreglumaður segir við þarlenda fjölmiðla að vakthafandi læknar og annað starfsfólk spítalans hafi talið hana látna vegna þess að því hafi ekki tekist að greina neinn púls hjá stelpunni.

Það voru nágrannar stúlkunnar sem sáu hana hreyfa sig í kistunni og tók faðir hennar hana upp og flutti á nærliggjandi sjúkrahús. Þar var henni gefið vatn, hlúð að henni og að lokum komst hún aftur í faðm fjölskyldu sinnar.

Heilbrigðisyfirvöld á eyjunum vita ekki að svo stöddu hvað olli dauðadáinu.