Fréttaljósmyndir ársins 2014

Hinir afar snjöllu ljósmyndarar Fréttablaðsins og Vísis eru sjaldan langt undan þegar fréttaviðburðir eiga sér stað. Oft ná þeir að fanga augnablikið betur en orð fréttaskrifara fá lýst og er það ástæða þess að þeir eru alltaf á ferð og flugi, alla daga ársins. Hér má sjá brot af þeim stórglæsilegu myndum sem þeir tóku á árinu sem senn er á enda.

Stórbruni í Skeifunni

Mikill eldur logaði í Skeifunni 11 hinn 6.júlí. Húsnæðið gjöreyðilagðist og gríðarlegt tjón hlaust af eldinum. Fleiri hundruð manns söfnuðust saman og fylgdust með störfum slökkviliðs og fór svo að lögregla þurfti að girða af svæðið svo slökkviliðið gæti sinnt störfum sínum. Hættuleg efni voru í lofti og töluverð hætta skapaðist og var hættuástandi lýst yfir um tíma.

Eldgosið í Holuhrauni

Meira um eld, en ekkert lát er á gosinu í Holuhrauni sem tók að gjósa í lok ágúst. Er það talið svipað til Kröflueldanna sem geisuðu frá 1975-1984. Ekkert bendir til þess að gosið sé í rénun en þegar þetta er skrifað þekur hraunið um 80 ferkílómetra. Eldgosið hefur vakið gríðarlega athygli, enda sjónarspilið algjört.

Nýr meirihluti í Reykvík kynnir helstu stefnumálin

Ný borgarstjórn var formlega kynnt í sól og blíðu í Elliðaárdal hinn 11.júní. Stefnumál nýs meirihluta voru í kjölfarið kynnt. Borgarfulltrúar voru vonum kátir með samkomulagið líkt og myndin sýnir.

Skuldaniðurfelling ríkisstjórnarinnar

Ríkisstjórnin kynnti leiðréttinguna svokölluðu í Hörpu í nóvember. Landsmenn voru ýmist sáttir eða ósáttir og loguðu samfélagsmiðlar vegna þessa. Meðaltal leiðréttingarinnar eru 1.350 þúsund krónur.

Tólf hross drukknuðu

Sá hörmulegi atburður átti sér stað nú í lok desember þegar tólf hross drukknuðu í Bessastaðatjörn. Hestarnir virðast hafa ráfað út á ísinn og hann í kjölfarið gefið eftir. Þyrla var notuð til að hífa hrossin upp úr vökinni og voru hræin flutt með vörubílum á urðunarstöðina við Álfsnes.

Sjúklingurinn á kaffistofunni

Verkfall lækna hefur haft töluverð áhrif á sjúklinga og þá sem hafa þurft að sækja sér hvers konar læknisþjónustu.  Guðni Páll Viktorsson er þar á meðal en hann hafði kennt sér meins og því ákveðið að leita á bráðamóttöku Landspítalans. Ákveðið var að leggja hann inn á hjartadeild til frekari rannsókna og fékk hann aðstöðu á heldur óvenjulegum stað innan deildarinnar, eða á kaffistofunni. Hann sagðist þó hafa það alveg ágætt og þegar honum var boðið að færa sig inn á herbergi afþakkaði hann það.

Hælisleitandi í tíu daga mótmælasvelti

Ghasem Mohamadi, tvítugur hælisleitandi frá Afganistan, svelti sig í tíu daga í apríl í mótmælaskyni. Hann hafði beðið í tvö ár eftir úrskurði um dvalarleyfi á Íslandi og sagðist hann vera orðinn þreyttur á biðinni. Í október bárust fregnir af því að ákveðið hefði verið að veita Mohamadi hæli hér á landi.

Lekamálið sem leiddi til afsagnar

Fátt hefur borið jafn oft á góma og lekamálið sem náði hámæli um mitt ár og allt fram til þess að Gísli Freyr játaði að hafa lekið trúnaðargögnum úr innanríkisráðuneytinu til fjölmiðla. Gísli Freyr var í kjölfarið dæmdur í átta mánaða skilorðsbundið fangelsi. Hanna Birna sagði af sér embætti innanríkisráðherra og Ólöf Nordal tók við.

Þessar myndir og fleiri í albúminu hér fyrir neðan.

Árið 2014 gert upp á Vísi.