Nýr innanríkisráðherra vill flugvöllinn í Vatnsmýrinni

Ólöf Nordal lýsti því yfir í pontu Alþingis að hún vildi að flugvöllurinn yrði áfram í Vatnsmýrinni. „Ég er þeirrar skoðunar að Reykjavíkurflugvöllur eigi að vera þar sem hann er,“ sagði Ólöf í mars 2011, þegar rætt var um framtíð Reykjavíkurflugvallar á þingi. Hún bætti við:

„Ef hægt væri að ná samkomulagi við Reykjavíkurborg um að bæta aðstöðuna á Reykjavíkurflugvelli — ég hygg að við sem höfum notað flugvöllinn, og það býst ég við að allir hér inni geri, gerum okkur grein fyrir að aðstaðan þar er ekki viðunandi og hana þarf að bæta — ef hægt væri að ná niðurstöðu á þeim nótum sem hæstvirtur innanríkisráðherra nefndi áðan í góðu samkomulagi við borgaryfirvöld hygg ég að það sé mjög mikilvægt skref í þá átt að ná sátt um innanlandsflugið og Reykjavíkurflugvöll þar sem hann og menn geri sér þá í leiðinni grein fyrir mikilvægi hans fyrir landið allt.“

Samgöngumál eru á könnu innanríkisráðherra.

Forveri Ólafar, Hanna Birna Kristjánsdóttir, var ekki eins afdráttarlaus í sinni afstöðu til staðsetningu flugvallar í Reykjavík. En hvar flugvöllurinn á að vera hefur lengi verið þrætumál á meðal þings og þjóðar. Hanna Birna sagði í ræðu á þingi fyrir rúmu ári síðan að staðsetningu flugvallarins ætti að finna í sátt við borgaryfirvöld:

„Ég minni hins vegar aðeins á það, af því að aftur slær hjartað eilítið í borgarfulltrúanum fyrrverandi, að borgarstjórn Reykjavíkur er líkt og Alþingi Íslendinga lýðræðislega kjörin af fólkinu í Reykjavík sem ég held að hafi alveg vitað hvað var verið að kjósa og hverja var verið að kjósa. Það fólk fer með hið lýðræðislega umboð,“ sagði hún og hélt áfram:

„Ég hef heldur aldrei heyrt borgarfulltrúana í Reykjavík tala þannig, en hér tala menn dálítið eins og borgarfulltrúar vilji völlinn endilega út úr Reykjavík. Það hefur ekkert verið afstaða borgarstjórnar Reykjavíkur heldur hefur það verið afstaða borgarstjórnar Reykjavíkur að ekki sé óeðlilegt að sveitarfélagið sé reiðubúið að skoða aðra staðsetningu í Reykjavík en bara þessa einu. Reykjavíkurborg hefur aldrei talað hátt og skýrt fyrir því að innanlandsflugvöllur skuli vera annars staðar.“

Þeir sem eru fylgjandi því að flugvöllurinn eigi að vera áfram í Vatnsmýrinni fagna því væntanlega nýjum ráðherra. Einn yfirlýstur stuðningsmaður núverandi staðsetningu flugvallarins, Ólafur F. Magnússon, fyrrum borgarstjóri, skrifaði athugasemd í bundnu máli við frétt Vísis um um Ólöf hefði verið skipuð innanríkisráðherra:

„ÓLAFARKVIÐA NORDAL

Kröftug hún kemur til baka

kasta þarf hýenum burt.

Mjög þarf á málefnum taka

meðan flugvöllur enn er kjurrt.“