Hundraða enn saknað eftir ferjuslys í Bangladess

Að minnsta kosti tólf eru látnir og hundraða er enn saknað eftir að ferja sökk í ánni Megna skammt frá Dakka, höfuðborg Bangladess í dag.

Yfirvöld í Bangladess segja óljóst hversu margir farþegar voru um borð í ferjunni þegar hún sökk en þeir gætu verið allt að 350. Sumir farþeganna náðu að synda í land þrátt fyrir vonskuveður og mikinn öldugang.

Björgunarmenn reyna nú að finna ferjuna en haft er eftir talsmanni lögreglu að konur og börn hafi verið meðal hinna látnu.

Ferjuslys eru sögð tíð í Bangladess og er slæmu viðhaldi kennt um auk þess sem algengt er að farþegafjöldi sé yfir leyfilegum mörkum.