Taarabt svarar Redknapp fullum hálsi

Framherjinn Adel Taarabt hjá QPR er allt annað en sáttur við gagnrýni stjórans síns, Harry Redknapp, sem sagði hann vera of feitan.

Taarabt fékk ekki að spila gegn Liverpool þar sem Redknapp  sagði að hann nennti ekki að æfa og væri þar af leiðandi of þungur.

Taarabt svaraði fyrir sig og segir Redknapp ekki vera mikinn þjálfara.

„Ég er atvinnumaður og þetta snýst ekki um hefnd heldur að vernda orðspor sitt," sagði Taarabt.

„Ég spilaði 90 mínútur í varaliðsleik og ef hann taldi mig ekki vera að hlaupa nóg þá hefði hann getað tekið mig út af. Kannski spilaði ég ekki eins vel og ég vildi í leiknum enda varaliðsleikur og ég fór gætilega.

„Kannski vill hann að ég tækli meira en ég er ekki þannig leikmaður. Þessar æfingar hjá honum eru þess utan ekki merkilegar. Það er enginn kraftur og hann nær mönnum ekki upp á tærnar. Það er engin áætlun hjá honum fyrir leiki. Þetta snýst bara um að hlaupa."