Innlent

Teigsskógarrök yfirvarp segja skógræktarfélögin

Kristján Már Unnarsson skrifar
Vegamálastjóri sýndi ráðherra vegamála Teigsskóg í fyrrasumar.
Vegamálastjóri sýndi ráðherra vegamála Teigsskóg í fyrrasumar. Fréttablaðið/Daníel.
Skógræktarfélag Íslands telur, ásamt skógræktarfélögum á Vestfjörðum, að ekki sé ástæða til að leggjast gegn vegagerð um Teigsskóg í Þorskafirði. Þetta kemur fram í ályktun sem send hefur verið fjölmiðlum í tilefni þess að því hafi meðal annars verið haldið fram í umræðu um ráðgerðan veg að nauðsynlegt sé að varðveita Teigsskóg. 

„Telja verður að þetta séu haldlaus rök, notuð sem yfirvarp. Örlítið brot af Teigsskógi og skóglendi að vestanverðu í Þorskafirði fer undir veg, samkvæmt nýjustu tillögu Vegagerðarinnar, innan við 1% af heildarflatarmáli skógarins. Skaðinn er því óverulegur. Við fyrirhugaðar framkvæmdir verður jafnmikill birkiskógur ræktaður innan héraðs til mótvægis við skerðingu í Teigsskógi. Birkiskóglendi á sunnanverðum Vestfjarðakjálkanum minnkar því ekki við gerð vegarins,“ segja skógræktarfélögin. Þau segja ennfremur:

„Engin sérstök náttúrufræðileg rök hníga því til þess að fáeinir hektarar af birki í Teigsskógi skuli vera sá farartálmi nauðsynlegum vegabótum sem raun ber vitni. Óhóflegar og illa rökstuddar verndarkröfur mega ekki hindra að lagðir verði nútímalegir vegir um sýsluna. Með því væri að óþörfu gengið gegn búsetugæðum íbúa sem hafa verið í fararbroddi við að rækta og vernda náttúrulegt skóglendi.“

Húsmæður á Vestfjörðum mótmæltu með búsáhöldum á frægum fundi á Patreksfirði haustið 2011 þeirri stefnumörkun Ögmundar Jónassonar, fyrrverandi innanríkisráðherra, að hafna vegi um Teigsskóg.Mynd/Egill Aðalsteinsson
Í ályktun skógræktarfélaganna segir að á Vestfjörðum sé að finna marga fallega birkiskóga. Nýr vegur um Teigsskóg muni greiða almenningi leið að Teigsskógi til að njóta hans og annarra fallegra náttúrufyrirbæra við utanverðan Þorskafjörð.

Félögin benda á að engir hafi varðveitt betur sinn upprunalega birkiskóg en Barðstrendingar. Kjarr sé mjög víða í sýslunni og nánast ómögulegt að leggja vegi án þess að að fara um kjarrlendi. Undanfarin tvö ár hafi Vegagerðin unnið að löngu tímabærum vegabótum vestar í sýslunni og hafi þurft að ryðja þar alls um 5 hektara birkiskógar. Til samanburðar sé talið að varanleg röskun í Teigsskógi og Þorskafirði verði samtals 6,1 hektari, verði farin sú veglína sem Vegagerð ríkisins kynnti nýlega.

Bent er á að samkvæmt gildandi lögum sé Vegagerðinni skylt að rækta nýjan birkiskóg á jafnstóru svæði og því sem skert er. Náttúrulegir birkiskógar í héraðinu séu jafnframt í mikilli útbreiðslu og vexti um þessar mundir.

Skógræktarfélag Íslands er samband allra skógræktarfélaga á Íslandi og málsvari þeirra en auk þess rita undir ályktunina skógræktarfélag Bolungarvíkur, Ísafjarðar, Dýrafjarðar, Bíldudals, Tálknafjarðar, Patreksfjarðar og Strandasýslu.


Tengdar fréttir

Ætlar að höggva á Ódrjúgsháls-hnútinn í haust

Ögmundur Jónasson, ráðherra vegamála, hyggst strax í haust höggva á hnútinn í deilunum um Teigsskóg sem hindra vegagerð á sunnverðum Vestfjörðum, og telur nýtt umhverfismat á nýjum forsendum koma til greina. Dýrafjarðargöng vill hann setja í forgang.

Vilja skoða sérlög á vegarlagningu um Teigsskóg

Skipulagsstofnun hafnar tillögu Vegagerðarinnar um veg um Teigsskóg. Forseti Alþingis vill að þingið setji lög um vegarlagninguna. Formaður Byggðastofnunnar tekur undir. Skipulagsstofnun bundin að lögum, segir talsmaður stofnunarinnar.

Hanna Birna segir Teigskóg í stjórnsýsluflækju

Þingmenn eru sammála um að það þoli enga bið að finna leið til lausnar vegabóta á sunnanverðum Vestfjörðum. Innanríkisráðherra segir til greina að setja lög vegna málsins.

Allt annað en Teigsskóg, segir Ögmundur

Ögmundur Jónasson innanríkisráðherra hefur fallið frá því að láta Vestfjarðaveg liggja yfir hálsana tvö í Gufudalssveit og er tilbúinn að skoða alla aðra kosti nema þann að fara í gegnum Teigsskóg. Kristján Möller, fyrrverandi samgönguráðherra, segir að leiðin um Teigsskóg sé sú eina færa.

Þingmaður Vinstri grænna fellst á veg um Teigsskóg

Þingmaður Vinstri grænna í Norðvesturkjördæmi, Lilja Rafney Magnúsdóttir, segir nýja tillögu Vegagerðarinnar um að Vestfjarðavegur um Gufudalssveit verði lagður um Teigsskóg vera ásættanlega.

Spyr hvort fuglar verði teknir fram yfir fólk á Vestfjörðum

Á að taka tré og fugla fram yfir lífsmöguleika byggðarinnar á Vestfjörðum? Þessari spurningu varpaði prófessor á Akureyri fram í dag inn í tuttugu manna nefnd sem vinnur að sátt um framtíðarlegu vegarins um sunnanverða Vestfirði. Ráðamenn á Vestfjörðum vilja að leiðin um Barðastrandarsýslur verði stytt um rúma tuttugu kílómetra með því að þvera Djúpafjörð og Gufufjörð og losna um leið við tvo erfiða hálsa, Hjallaháls og Ódrjúgsháls.

Ólína leggst gegn áskorun Barðstrendinga

Þingmenn Norðvesturkjördæmis hafa verið boðaðir til Patreksfjarðar klukkan þrjú í dag til að taka við áskorun eitt þúsund íbúa á sunnanverðum Vestfjörðum um að nýr þjóðvegur verði lagður um Teigsskóg í stað vegarins um Ódrjúgsháls. Ólína Þorvarðardóttir lýsir andstöðu við áskorun íbúanna.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.