Spyr hvort fuglar verði teknir fram yfir fólk á Vestfjörðum

Á að taka tré og fugla fram yfir lífsmöguleika byggðarinnar á Vestfjörðum? Þessari spurningu varpaði prófessor á Akureyri fram í dag inn í tuttugu manna nefnd sem vinnur að sátt um framtíðarlegu vegarins um sunnanverða Vestfirði.

Ráðamenn á Vestfjörðum vilja að leiðin um Barðastrandarsýslur verði stytt um rúma tuttugu kílómetra með því að þvera Djúpafjörð og Gufufjörð og losna um leið við tvo erfiða hálsa, Hjallaháls og Ódrjúgsháls. Þetta þýddi að vegurinn færi um Teigsskóg í Þorskafirði, sem landeigendur og náttúruverndarsamtök leggjast gegn.

Ögmundur Jónasson, ráðherra vegamála, sagðist í sumarbyrjun ætla að höggva á hnútinn í haust og því til undirbúnings hélt hann í dag þriðja samráðsfundinn í þessum mánuði með helstu málsaðilum. Þóroddur Bjarnason, prófessor við Háskólann á Akureyri, einfaldaði málið; svara þyrfti spurningum eins og hversu mikið við ættum að hugsa um fugla og tré, hversu mikið við ættum að hugsa um lífsmöguleika byggðarinnar og hversu mikið við ættum að hugsa um kostnað.

Hægt væri að bjarga Vestfjörðum en það væri dýrt og væru menn tilbúnir til þess? Ef menn vildu bjarga byggðinni væri forgangsatriðið þetta: Að stytta leiðina sem mest. Og það munaði um hvern kílómetra sem hægt væri að stytta, sagði Þóroddur, og bætti við að þetta yrði að gera eins hratt og hægt væri, því menn hefðu ekkert langan tíma.

Ráðherrann stefnir að niðurstöðu í september. Ögmundur kveðst þó hafa efasemdir um að allir verði sáttir með þá niðurstöðu. Það versta sé þó að hafa þetta í lausu lofti of lengi og því sé mikilvægt að fá niðurstöðu.