Vonar að tímabundin afskipti bæti íslenska blaðamennsku

„Á undanförnum árum hefur DV fjallað í 290 greinum um mig, fjölskyldu mína og fyrirtæki sem ég veiti forsöðu,“ segir Björn Leifsson betur þekktur sem Bjössi í World Class.

Björn sendi frá sér yfirlýsingu í dag en breytt eignarhald hjá DV, þar sem Björn hefur meðal annars á skömmum tíma keypt hlut og selt, hefur verið til umfjöllunar undanfarna daga. Aðalfundur félagsins fór fram í gær þar sem Þorsteinn Guðnason var kjörinn stjórnarformaður. Þorsteinn keypti einmitt 4,42 prósenta hlut Björns í vikunni en Björn hafði lýst því yfir að eina ástæða kaupa sinna á hlutnum væri til að bola Reyni Traustasyni, ritstjóra og hluthafa, af blaðinu.

Björn segir að ekkert hafi verið til sparað í umfjöllun DV undanfarin ár við að skemma mannorð sitt og rangfærlsur margendurteknar þrátt fyrir betri vitund.

„Því miður hefur komið í ljós að margir hafa trúað þessum síendurteknu lygum. Ég sá því ekki annað ráð en að höfða miskabótamál gegn DV. Þegar ég fékk tækifæri til að hafa áhrif í hlutahafahópi DV með því að kaupa lítinn eignarhlut sá ég möguleika á að vekja athygli á þeirri ritstjórnarstefnu sem þar hefur verið stunduð. Ég vona að tímabundin afskipti mín af þessu félagi verði til þess að bæta blaðamennsku á Íslandi.“

Björn vil koma eftirfarandi hlutum á framfæri vegna umfjöllunar DV í tengslum við sig.

1. World Class, ég persónulega og önnur fyrirtæki undir minni stjórn hafa ekki fengið neinar afskriftir.

2. Ekki hefur verið skipt um félög sem standa að rekstri líkamsræktarstöðva World Class og þau hafa ekki skipt um kennitölu.

3. Ég hef ekki haft neina aðkomu að lokun Adidas búðarinnar í Kringlunni.

4. Vegna krafna Straums fjárfestingabanka í kjölfar fjárfestinga í Danmörku sem félagið Þrek tók þátt í með 25% hlut var óskað eftir gjaldþrotaskiptum félagsins. Áður en til slita kom tókst samkomulag við kröfuhafa og hluthafar tóku aftur við rekstri félagsins sem er fátítt. Í samningum þessum fólust ekki afskriftir á lánum félagsins. Þrek hafði unnið tvö af fjórum dómsmólum sem slitastjóri fór fram með en samkomulag varð um að fella hin tvö málin niður.

5. Félögin sem standa að rekstri líkamsræktarstöðva World Class hafa ávallt staðið við sínar skuldbindingar.