Stærðin skiptir máli: Ber fyrir sig að typpið sé of lítið

Karlmaður á sextugsaldri er sakaður um að hafa berað sjálfan sig fyrir táningsstúlku í Þýskalandi. Eiginkona hans sagði fyrir dómi að atburðarásin gengi ekki upp. Limur eiginmannsins væri of lítill til að hann gæti lafað út úr buxnaklaufinni.

Daily Mail greinir frá en þar kemur fram að maðurinn, sem kallaður er Herbert O, hafi verið að afhenda stúlkunni pakka í ágúst í fyrra. Hann hafi sýnt henni meira en hún hafi beðið um.

Stúlkan fór ásamt móður sinni samdægurs og lagði fram kæru hjá lögreglunni í Leer í Þýskalandi. Herbert neitar sök og ber því við að hann sé of smávaxinn að neðan til að athæfið hafi getað átt sér stað. Eiginkona hans er eitt vitna verjandans og staðfestir orð eiginmannsins.

„Fyrirgefðu elskan mín en typpið þitt er of lítið til að geta hangið utan úr buxunum,“ sagði konan fyrir dómi. Í kjölfarið óskaði verjandinn eftir því að fram færi mæling á lim umbjóðanda síns. Dómarinn féllst á það.

„Fyrst eiginkona hans hefur rætt svo opinskátt um þetta verðum við að fylgja þessu eftir,“ sagði Ulrike Andrees dómari. Verjandinn er staðráðinn í að verja mannorð Herberts og meðal annars neitað tilboði um sektargreiðslu gegn því að málið verði látið falla niður.

Réttarfræðingurinn Norbert Burns segist málið einsdæmi.