Setja skilyrði fyrir rússneskum hjálpargögnum

Yfirvöld í Úkraínu hafa sett skilyrði fyrir því að hjálpargögn berist inn í austurhluta landsins frá Rússlandi. Um þrjú hundruð vörubílar með um tvö þúsund tonn af matvælum og lyfjum er nú á leið frá Moskvu til Úkraínu.

Talsmaður öryggisráðs Úkraínu sagði gögnin þurfa að fara inn um landamærastöð á valdi Úkraínustjórnar, en rússneskir aðskilnaðarsinnar ráða yfir svæðum í austurhluta landsins.

Anders Fogh Rasmussen, aðalframkvæmdastjóri NATO, lýsti í gær yfir áhyggjum af því að Rússar kynnu að hefja innrás í Úkraínu undir yfirskini neyðaraðstoðar.

Í frétt BBC segir að 1.500 manns hafi fallið í átökum í austurhluta Úkraínu frá því að stjórnarherinn hóf sókn gegn aðskilnaðarsinnum á bandi Rússlandsstjórnar. Átökin hafa jafnframt leitt til þess að fleiri hundruð þúsund hafa þurft að flýja heimili sín og hafa margir haldið yfir landamærin og til Rússlands.