Framkvæmdastjóri NATO kemur til Íslands á morgun

Anders Fogh Rasmussen, framkvæmdastjóri Atlantshafsbandalagsins (NATO) og fyrrverandi forsætisráðherra Dana, kemur til Íslands á morgun í boði Sigmundar Davíðs Gunnlaugssonar forsætisráðherra. Heimsóknin er liður í undirbúningi fyrir leiðtogafund NATO sem haldinn verður í Wales í næsta mánuði.

Í tilkynningu segir að Rasmussen muni meðal annars eiga fundi með forsætisráðherra og Gunnari Braga Sveinssyni utanríkisráðherra og heimsækja Alþingi áður en hann heldur af landi brott að morgni fimmtudags.

Rasmussen heimsótti Íslendinga fyrst árið 2009 en ljóst er að þetta verður hans síðasta heimsókn í embætti. Hann lætur af störfum sem framkvæmdastjóri í lok september.