69 ár frá kjarnorkuárásinni á Hiroshima

Japanir minntust þess í dag að 69 ár eru síðan að Bandaríkjamenn slepptu kjarnorkusprengju á borgina Hiroshima árið 1945. Borgarstjóri Hiroshima, Kazumi Matsui, biðlaði í ávarpi sínu til forseta Bandaríkjanna, Barack Obama og annarra leiðtoga heimsins að heimsækja borgina og kynnast sárum hennar frá fyrstu hendi.

„Ef þið komið munu þið sannfærast um að kjarnorkuvopn eru af hinu illa og að þeim verði að eyða úr heiminum,“ sagði Matsui í ræðu sinni.

Hiroshima réðst í mikla herferð fyrr á þessu ári til að sannfæra Obama um að sækja borgina heim. Fólk hvaðanæva að úr heiminum sendi svokallaðar „origami“-trönur – sem eru tákn um frið - til Hvíta hússins og er fjöldi þeirra sem rataði til Washington talinn skipta tugum milljóna.

Um 45 þúsund manns tóku þátt í mínútuþögn í Friðargarðinum í Hiroshima til minningar um 140 þúsund fórnarlömb árásarinnar árið 1945 sem margir telja marka endalok síðari heimstyrjaldarinar. Þremur dögum síðar var annarri kjarnorkusprengju varpað á japönsku borgina Nagasaki með þeim afleiðingum að 70 þúsund manns féllu í valinn.

Rétt rúmlega 190 þúsund manns eru enn á lífi og til vitnis um sprengingarnar fyrir hartnær 70 árum síðan og er meðalaldur þeirra 79 ár. Flestir þeirra sem sóttu athöfnina í dag voru afkomendur þeirra.