Vilhjálmur prins út á vinnumarkaðinn

Vilhjálmur Bretaprins mun fara út á vinnumarkaðinn næsta vor þegar hann hefur störf sem sjúkraþyrluflugmaður.

Prinsinn mun sækja námskeið og hefja nauðsynlega þjálfun þegar í næsta mánuði, ári eftir að hann lét af störfum í breska flughernum þar sem hann flaug þyrlum við leit og björgun.

Í fréttatilkynningu frá prinsinum segir að þetta sé í fyrsta sinn sem maður í beinni erfðaröð bresku krúnunnar fái sér starf á almennum vinnumarkaði. Vilhjálmur mun starfa sem slysaþyrluflugmaður í Austur-Anglíu, en það er einkarekið fyrirtæki sem sér um rekstur og þjónustu þyrlanna.

Í tilkynningunni segist Vilhjálmur vera mjög spenntur að hefja störf, hann mun gefa öll laun sín til góðgerðarmála. Prinsinn varði rúmum sjö árum í breska flughernum og hefur hann lokið yfir 1.300 flugtímum á sínum ferli.