Júdófélagi Pútíns kominn á svarta listann

Júdófélaga og öðrum virktarvinum Vladimírs Pútín Rússlandsforseta hefur nú verið bætt á lista framkvæmdastjórnar Evrópusambandsins yfir þá sem fá eignir sínar frystar í tengslum við viðskiptaþvinganir ESB á hendur Rússum.

Á listanum eru átta rússneskir einstaklingar og þrjú fyrirtæki, en viðskiptaþvinganirnar eru komnar til vegna stuðnings Rússa við aðskilnaðarsinna í Úkraínu. Þar má meðal annars finna milljarðamæringinn Arkady Rotenberg sem hefur lengi verið einn helst júdófélagi Pútíns, en Rotenberg hefur verið á sambærilegum lista Bandaríkjastjórnar síðan í mars.

Yury Kovalchuk og Nikolai Shamalov, stærstu hluthafarnir í Bank Rossiya, eru einnig á listanum, sem og Rússneski viðskiptabankinn sem var fyrstur til að hefja viðskipti á Krímskaga eftir að Rússar innlimuðu skagann fyrr á árinu.

Á vef Moscow Times segir að með þessum uppfærða lista hefur ESB nú fryst eignir eða takmarkað ferðafrelsi 95 Rússa og 23 rússneskra fyrirtækja.