Dunga tekur við Brasilíu á ný

Dunga hefur verið ráðinn landsliðsþjálfari Brasilíu. Hann tekur við af Luiz Felipe Scolari sem hætti eftir HM fyrr í sumar, þar sem Brasilía endaði í fjórða sæti eftir að hafa tapað tveimur síðustu leikjum sínum 10-1 samanlagt.

Það má segja að Dunga sé kominn á kunnuglegar slóðir en hann stýrði Brasilíu á árunum 2006-2010.

Undir hans stjórn vann Brasilía S-Ameríkukeppnina árið 2007 og Álfukeppnina tveimur árum síðar. Hann stýrði einnig liði Brasilíu sem vann til bronsverðlauna á Ólympíuleikunum í Peking 2008.

Dunga var leystur undan störfum eftir að Brasilía tapaði fyrir Hollandi í átta-liða úrslitum á HM 2010 í Suður-Afríku.

Dunga, sem lék á sínum tíma 91 landsleik fyrir Brasilíu, sagðist hæstánægður að vera kominn aftur í gamla starfið sitt:

"Ég er ótrúlega ánægður að vera kominn aftur," sagði Dunga á blaðamannafundi í dag, en hans bíður erfitt verkefni að reisa brasilíska liðið við eftir stórtapið gegn Þjóðverjum í undanúrslitum HM í sumar.

"Ég hef áður verið í þessu starfi. Ég var beðinn um að bjarga heiðri brasilíska landsliðsins og ná árangri.

"Þetta er annað sinn sem ég tek við liðinu og mér er ætlað að undirbúa liðið fyrir HM 2018," sagði Dunga sem var fyrirliði Brasilíu þegar liðið varð heimsmeistari 1994 í Bandaríkjunum.