„Ég læt fötlun mína ekki hafa áhrif á drauma mína"

„Hin fræga tilvitnun í Walt Disney „Ef þig getur dreymt það getur þú gert það,“ hefur verið Tim Harris mikill innblástur í lífinu. Hann fæddist árið 1986 með Downs-heilkennið. Líf hans hefur farið fram úr björtustu vonum.“ Þessi skilaboð má finna á vefsíðu veitingastaðarins Tim‘s Place, sem er í eigu Tim Harris.

Veitingastaðurinn, sem er í borginni Albuquerque í New Mexico, hefur vakið mikla athygli fjölmiðla í Bandaríkjunum í gegnum tíðina. Tim opnaði staðinn ásamt foreldrum sínum árið 2010. Fjölmiðlar á borð við CNN og CBS hafa kíkt í heimsókn til Tim sem leggur mikla áherslu á að koma fram við viðskiptavini sína eins vel og hann getur. Til að mynda vill hann faðma sem flesta, svo öllum líði eins og heima hjá sér. Á meðan aðrir veitingastaðir vestanhafs segja frá því hversu marga hamborgara þeir hafa selt, hreykir Tim sig af því hversu marga hann hefur faðmað. „Yfir 40 þúsund faðmaðir,“ stendur á skilti inni á veitingastaðnum.

Hér að neðan má sjá hjartnæmt myndband sem sýnir hversu glaður Tim er í vinnunni. Hann vaknar alla morgna klukkan hálf sex og er kominn í vinnuna um sjö. Hann segist yfirleitt dansa fyrir utan skemmtistaðinn, því hann sé svo spenntur að byrja daginn. „Við bjóðum upp á morgunmat, hádegismat og faðmlög. Faðmlögin eru best,“ segir hann.

Í myndbandinu má sjá hversu ótrúlega vel Tim tekur á móti gestum sínum. „Tim‘s Place er sérstakur staður. Því hann er undir minni stjórn og í minni eigu,“ segir hann og bætir við: „Síðan ég var barn hefur mig langað að eiga veitingastað. Þannig að ég bað pabba minn um að hjálp. Sem betur fer,“ segir hann.

Keith Harris segir Tim, son sinn, hafað viljað eignast veitingastað síðan hann var fjórtán ára. Hann segir að hann hafi kannski ekki tekið strákinn alvarlega í fyrstu, en svo hafi allir áttað sig á að Tm var alvara. „Útkoman er söguleg,“ segir stoltur pabbinn.

Móðir hans Jeannie Harris segir: „Við höfum ekki enn heyrt af öðrum einstaklingi með downs-heilkennið sem á sinn eigin veitingastað. En við vonum að fleiri munu prófa það.“

„Uppáhaldið mitt er allt fólkið sem kemur,“ segir Tim og bætir við: „Faðmlögin eru mikli mikilvægari en maturinn. Maturinn er bara matur,“ segir hann og hlær. 

Tim hefur líka keppt í nokkrum greinum á Ólympíuleikum fatlaðra. Í myndbandinu hér að neðan má heyra hann segja við einn viðskiptavin: „Ég á fleiri medalíur en Michael Phelps.“

„Ég læt fötlun mína ekki hafa áhrif á drauma mína. Fatlað fólk getur gert allt sem það ætlar sér, enda er það fólk einstakt. Við erum gjöf til annarra í heiminum.“

Hér að neðan má sjá myndbandið sem fjallar um Tim. Áhugasamir geta líka styrkt staðinn með því að kaupa boli á þar til gerðri vefsíðu.