Einmana hestur í Svíþjóð á rétt á félaga

Hestur nokkur í vesturhluta Svíþjóðar á rétt á því að eignast hestavin samkvæmt úrskurði lénsstjórnar í Vestur-Gautlandi. Yfirvöld hafa sent eiganda hestsins fyrirmæli um að hann hafi ekki uppfyllt þarfir hins einmana hests um félagsskap, segir í Skaraborgs Läns Tidning.

Í fréttinni segir að umræddur hestur hafi verið einn á beit í haga, um 140 metrum frá næsta haga og þar með næstu hestum. Lénsstjórninn krefst þess að hesturinn fái að sjá, heyra, og finna lykt af öðrum hestum og vill sjá breytingu á högum hestsins eigi síðar en 1. nóvember.