Kortleggur skaddaða ljósastaura af völdum hundahlands

Svíinn Fredrik Olsson fékk heldur óvenjulegt sumarstarf hjá borgaryfirvöldum í Karlstad þegar honum var falið að kortleggja þá ljósastaura borgarinnar sem hafa skaddast af völdum hundahlands.

Hundar sem míga á ljósastaura geta reynst sveitarfélögum dýrir og hafa yfirvöld í Karlstad nú ákveðið að halda skrá utan um skemmdirnar.

Á vef DN segir að Olsson sé nýúrskrifaður verkfræðingur sem hafi hafið störf fyrir um mánuði og vonast til að klára svokallað hland-kort borgarinnar fyrir næstu mánaðarmót.

Olsson segir ryð myndast vegna hlandsins og í sumum tilvikum myndast göt svo sjáist í leiðslur ljósastaursins. „Við sjáum líka að ljósastaurar meðfram göngustígum þar sem hundar eru algengir eru mun verr farnir en ljósastaurar á stærri vegum.“

Um 200 þúsund krónur kostar að skipta um ljósastaur og telur Olsson marga hundaeigendur vera ómeðvitaða um vandamálið.