Vélmenni húkkar far þvert yfir Kanada

Vélmenni á stærð við barn reynir nú að húkka sér far þvert yfir Kanada þar sem hann treystir á góðmennsku ókunnugra og eigin sjarma.

Vélmennið hitchBOT hóf för sína í Halifax um helgina og vonast hönnuðir þess til að það ljúki ferð sinni í Bresku Kólumbíu, rúmum sex þúsund kílómetrum í burtu áður en langt um líður.

Vélmennið er að sjálfsögðu háð því að ókunnugir leyfi honum að sitja í bíl sínum. Á vef Independent segir að hitchBOT sé nú þegar kominn til Campbellton um 560 kílómetra frá Halifax.

Frauke Zeller, hönnuðurinn sem starfar við Ryerson-háskóla í Toronto, segir vanalega spurt hvort við getum treyst vélmennum. „Í þessu verkefni er þessu snúið við. Geta vélmenni treyst mönnum?“

Á vef hitchBOT má fylgjast með ferð ferðalangsins.