Sarkozy stendur í ströngu

Nicolas Sarkozy, fyrrverandi forseti Frakklands, hefur verið ákærður fyrir spillingu. Sarkozy mætti fyrir dómara í gær eftir að hafa mátt sæta yfirheyrslum lögreglu sem stóðu í 15 klukkustundir.

Heimspressan öll fylgist grannt með gangi mála en þetta mun vera í fyrsta skipti sem fyrrum æðsti maður Frakklands er hafður í haldi lögreglu. Upphaflega var Sakozy sakaður um að hafa þegið fé í kosningasjóð sinn sína frá fyrrum leiðtoga Líbyu, sjálfum Gaddafi. Sarkozy stefndi á að bjóða sig fram til forseta árið 2017 en rannsóknin er talin hafa bundið enda á allar slíkar væntingar.

Nú beinist rannsókn að því hvort hinn 59 ára Sarkozy, sem var forseti frá árinu 2007 til 2012, hafi lofað dómaranum Azibert stöðu í Monaco í skiptum fyrir upplýsingar um rannsókn sem snéri að illa fengnu fé í kosningasjóð hans. Þá er einnig verið að rannsaka hvort Sarkozy hafi verið varaður við því að sími hans væri hleraður. Azibert hefur einnig verið yfirheyrður vegna málsins.

Forveri Sarkozy á forsetastóli, Jacques Chirac, hlaut skilorðsbundinn fangelsisdóm árið 2011, fundinn sekur um fjárdrátt en það var þegar hann var borgarstjóri í París og hann var aldrei hafður í haldi og yfirheyrður sem slíkur.