Fjórir slasaðir í Pamplóna

Fjórir voru fluttir á sjúkrahús eftir fyrsta nautahlaup San Fermín hátíðarinnar í Pamplóna á Spáni í morgun. Einn var stunginn í lærið en þrír brákuðust annars staðar á líkamanum. Að sögn The Local stóð hlaupið einungis yfir í um 25 sekúndur.

Á síðasta ári voru alls fimmtíu manns fluttir á sjúkrahús eftir átta nautahlaup hátíðarinnar, en fimmtán hafa látið lífið í hlaupunum frá því að hátíðin fór fyrst fram árið 1911. Síðasta dauðsfallið átti sér stað fyrir fjórum árum þegar 27 ára Spánverji var stunginn í háls, hjarta og lungu.

Í tilraun til að draga úr alvarlegum slysum hafa bæjaryfirvöld í Pamplóna nú tekið upp á að sekta fólk sem brjóta settar öryggisreglur um allt að 10 milljónir króna.

Mikill fjöldi fólks, alls staðar að úr heiminum, sækir hátíðina á ári hverju. Nautahlaup er algeng hefð á Spáni, en hátíðin í Pamplóna nýtur ætíð sérstakrar athygli eftir að bandaríski rithöfundurinn Ernest Hemingway ritaði um hlaupið í bók sinni Og sólin rennur upp.