Bindur enda á vopnahlé í Úkraínu

Petro Poroshenko, forseti Úkraínu, hefur bundið endi á einhliða vopnahlé stjórnvalda og segir að her landsins muni ráðast gegn aðskilnaðarsinnum í austurhluta Úkraínu. „Við munum gera árás og frelsa land okkar,“ segir hann í tilkynningu á vefsíðu sinni.

Aðskilnaðarsinnar í Úkraínu hafa ekki lagt niður vopn sín, yfirgefið herteknar landamærastöðvar né uppfyllt önnur skilyrði einhliða vopnahlés stjórnvalda í Úkraínu. Forseti Úkraínu ræddi í dag við leiðtoga Rússlands, Frakklands og Þýskalands í síma.

Símtalið átti sér stað áður en vopnahlé yfirvalda í Úkraínu rann út. Það hafði áður verið framlengt úr sjö dögum í tíu og var liður áætlunar um að binda endi á átökin í landinu. Yfir 400 manns hafa fallið í bardögum í Úkraínu síðan í apríl.

AP fréttaveitan segir frá því að eftir að vopnahléið rann út hafi aðskilnaðarsinnar ekki lagt niður vopn sín eins og Petro Poroshenko, forseti Úkraínu fór fram á. Hann fór einnig fram á að aðskilnaðarsinnar yfirgæfu þrjár landamærastöðvar sem þeir stjórna.

Í ræðu í kvöld sagði Poroshenko þetta einstaka tækifæri til að koma á friði hefði ekki tekist vegna glæpsamlegs háttalags aðskilnaðarsinna.

„Að enda vopnahléið er okkar svar til hryðjuverkamanna, vopnaðra uppreisnarmanna og ræningja, til allra þeirra sem hæðast að friðsamlegri þjóð, til þeirra sem lama efnahag svæðisins. Til þeirra sem svipta fólk möguleika á venjulegu, friðsamlegu lífi.“

Þörf á tvíhliða vopnahléi

Embættismenn í Frakklandi segja samtal leiðtogana í dag hafa um tíma snúið að því að koma á tvíhliða vopnahléi og að alþjóðlegir eftirlitsmenn vakti landamæri Úkraínu og Rússlands.

Alexander Borodai, leiðtogi aðskilnaðarsinna, tók þeirri hugmynd vel, en þvertók fyrir að hans menn myndi yfirgefa landamærastöðvarnar.

Utanríkisráðherra Rússlands sagði Vladimír Pútín, forseta Rússlands, hafa stungið upp á því að bæði eftirlitsmenn frá Úkraínu og Evrópu vöktuðu landamærin Rússlandsmegin. Þannig væri hægt að ganga úr skugga um að ekkert ólöglegt ætti sér stað þar.

Talsmaður Hvíta hússins sagðist fagna jákvæðum tóni Pútíns, en sagði hann þurfa að ganga til framkvæmda. Í stað þess að reyna að komast hjá frekar viðskiptaþvingunum með jákvæðum yfirlýsingum.

Þrátt fyrir að vopnahléið væri ekki útrunnið létust að minnsta tveir í átökum í borginni Slovyansk í morgun.