Torres: Mun betri nú en 2010

Sóknarmaðurinn Fernando Torres segir að núverandi landslið Spánar sé mun betra í dag en fyrir fjórum árum síðan.

Spánverjar urðu heimsmeistarar í Suður-Afríku árið 2010 eftir að hafa lagt Hollendinga í framlengdum úrslitaleik, 1-0.

Hollendingar gerðu sér hins vegar lítið fyrir og kjöldrógu Spánverja, 5-1, í fyrsta leik liðanna á HM í Brasilíu.

„Það er ekki hægt að segja að liðið hafi versnað. Ég myndi segja að það sé betra í dag,“ sagði Torres fyrir leik Spánverja gegn Síle á morgun.

„Ég tel að hópurinn sé vel undirbúinn fyrir svona aðstæður. Við höfum gengið í gegnum margt súrt og sætt saman. Við vitum hvað við getum og ég held ekki að andlega hliðin verði vandamál.“

„Liðið og leikmennirnir hafa þroskast. Það er ástæðulaust að breyta um leikkerfi. Við töpuðum fyrsta leik okkar í Suður-Afríku, héldum okkar striki og urðum meistarar.“