Versta tap Spánar í 64 ár

Heims- og Evrópumeistarar Spánar máttu í kvöld þola sitt versta tap í landsleik síðan 1950.

Spánverjar töpuðu í kvöld fyrir Hollandi, 5-1, í fyrsta leik B-riðils á HM í knattspyrnu. Spánverjar komust reyndar yfir, 1-0, en Hollendingar keyrðu svo yfir þá í síðari hálfleik.

Spánn tapaði fyrir Brasilíu, 6-1, í úrslitakeppni HM árið 1950 en hún fór fram í Brasilíu, rétt eins og nú.

Það er þó ekki versta tap liðsins frá upphafi en Spánn tapaði 7-1 fyrir Ítalíu árið 1928 og svo aftur með sama mun fyrir Englandi þremur árum síðar.