Miklar öryggisráðstafanir vegna forsetakosninga

Miklar öryggisráðstafanir hafa verið gerðar vegna forsetakosninganna í Sýrlandi, en kjörstaðir opnuðu snemma í morgun. Einungis er kosið í þeim hlutum Sýrlands sem stjórnarherinn ræður, og kosið er til sjö ára. Stjórnarandstæðingar telja að stjórnarherinn áformi árásir á kjörstaði og ætli að koma sökinni á andstæðinga sína.  Þá hafa uppreisnarmenn hótað því að trufla kosningarnar.

Talið er nær öruggt að sitjandi forseti Sýrlands, Bashar al-Assad, muni bera sigur úr býtum þrátt fyrir að tveir aðrir, Maher Hajjar og Hassan al-Nouri, séu í framboði. Andstæðingar hans ætla ekki að taka þátt og fullyrða að úrslitum verði hvort eð er hagrætt. Undir þetta taka mörg vestræn ríki en þetta mun vera í fyrsta sinn í áratugi sem fleiri en eitt nafn er á kjörseðlinum. Sýrlendingar hafa raunar ekki verið þekktir fyrir að halda frjálsar kosningar og þegar Assad tók við af föður sínum, sem komst til valda fyrir fjórtán árum, fékk hann 99 prósent atkvæða. Faðir hans, alavíski herforinginn Hafez- al-Assad, var við völd í Sýrlandi í 29 ár.

Kosningarnar fara fram í miðju borgarastríði, sem staðið hefur yfir í um þrjú ár. Talið er að 125 þúsund manns hafi látið lífið í átökunum og hafa meira en tvær milljónir flúið heimili sín. Ástandið er slæmt og óttast Sameinuðu þjóðirnar að hungursneið sé yfirvofandi.

Kjörstaðir eru hátt í tíu þúsund og rúmlega 15 milljónir manna eru á kjörskrá.