Porosjenko vill binda enda á átökin fyrir vikulok

Petro Porosjenko, forseti Úkraínu, lofaði í gær að binda enda á átökin í austurhluta landsins fyrir vikulok.

Forsetinn stendur nú í ströngu við gerð tvíhliða samnings við Rússlands sem koma á í veg fyrir að Rússar skrúfi fyrir gas til landsins og lægi ófriðaröldurnar sem dregið hafa um 200 manns til dauða á síðustu vikum.

Eftir að Porosjenko sór embættiseið sinn á laugardag hét hann því að ganga til samninga við Evrópusambandið sem myndi óneitanlega draga úr áhrifum stórveldisins í austri á stjórnvöld í Kænugarði. Það hefur ekki orðið til þess að draga úr átökum í landinu og hafa loftárásir haldið áfram á borgina Slavyansk í austurhluta landsins þar sem aðskilnaðarsinnar ráða lögum og lofum.

Um 15 prósent af öllu jarðefnagasi frá Rússlandi til Evrópu fer í gegnum Úkraínu og ef að samningar nást ekki milli ríkjanna tveggja gætu afleiðingarnar orðið geigvænlegar fyrir efnahag Úkraínu og gasverð í Evrópu.

Þó ríkir töluverð bjartsýni í samninganefndum landanna sem nú funda í Brussel og hafa heimildarmenn The Guardian haft á orði að samningar um fyrri gaskaup Úkraínu séu á lokametrunum.